فالسہ اور اس کے استعمالات

براعظم ایشیا کا مقبول ترین پھل فالسہ اپنے ذائقے اور فرحت بخش اثرات کے باعث بڑی اہمیت کا حا مل ہے۔ اس کا سائز کم و بیش مٹر جتنا ہوتا ہے۔ ابتدامیں سبز پھر سرخ اور آخر میں سیاہی مائل ہو جاتا ہے۔ اس کے پھو ل رنگت میں زرد اور پتے شکل کے اعتبار سے توت کی طرح ہوتے ہیں لیکن اس سے کچھ بڑے جبکہ ان کے کناروں پر خطوط ہوتے ہیں۔ اس کا ذائقہ شیریں و ترش ہوتا ہے۔ اس کا مزاج سرد دوسرے درجے میں اور تر درجہ اول میں ہوتا ہے۔گرمیوں کے موسم میں فالسہ بہت بڑی قدرتی نعمت ہے۔

اس لذیذ پھل کے بے شمار طبی اور غذائی فوائد ہیں، فالسے کا شربت بلڈ پریشر اور سر درد میں بھی فائدہ مند ہے۔ شدید گرمی اور لو میں اس کا شربت سن اسٹروک سے محفوظ رکھتا ہے۔موسم گرما میں یہ بڑے شوق سے کھایا جاتا ہے۔ اس میں 81 فیصد پانی کے علاوہ پروٹین اور نشاستہ بھی موجود ہوتا ہے۔تحقیق کے مطابق فالسہ جگر اور یرقان کے مریضوں کے لیے مفید ہے۔

فالسہ معدہ،جگراور دل کو طاقت دیتا اور پیاس بجھاتا ہے۔ یہ پیشاب کی سوزش کو بھی ختم کرتا ہے اورگرمی کے بخا ر کو فائدہ دیتا ہے۔فالسہ کااختلاج القلب اور خفقان میں بے حد مفید ہوتا ہے۔ فالسے کا رُب بھی تیار کیا جاتا ہے جو معدہ کی طاقت کے لیے استعمال کیا جاتا ہے ۔فالسے کے پانی سے غرارے کرنے سے خناق کو فائدہ ہوتا ہے۔ یہ صفراوی اسہال، ہچکی اور غشیان وقے کو بند کرتا ہے۔ تپ دق (ٹی بی) میں بھی فالسے کا استعمال بے حد مفید ہے ۔ معدہ وسینہ کی جلن ، دل کا اختلاج اور خاص طور پر بے چینی کو دور کرتا ہے۔ کھٹا اور نیم پختہ فالسہ استعمال نہیں کرنا چاہیے۔ عورتوں کی مخصوص بیماریوں مثلاً لیکوریا (سیلان الرحم) میں بھی مفید ہوتا ہے۔ ذیابیطس کے لیے فالسے کے درخت کا چھلکا 60گرام رات پانی میں بھگو دیں اور صبح مل چھان کر مریض کوکم ازکم پانچ روز تک پلائیں۔ اس سے ذیابیطس (شوگر )پر کنٹرول ہو جاتا ہے۔ جگر کی گرمی کو دور کرنے کے لیے فالسے کو جلا کر کھار بنائیں اور 250 ملی گرام صبح و شام استعمال کریں ۔یہ مصفی خون بھی ہے۔

فالسے کے درخت کی چھال کے چھوٹے چھوٹے ٹکڑے 50 گرام اور بنولہ25گرام دونوں کو کوٹ کر ایک لٹر پانی میں بھگو دیں،مل چھان کر پھیکا یا نمک ملا کر پلانے سے ذیابیطس شکری کنٹرول ہو جاتی ہے۔ پھوڑے پھنسیوں پر فالسے کے پتے رگڑ کر لگانے سے فورا ًفائدہ ہوتا ہے۔ فالسے کو دو روز سے زیادہ بغیر فریج کے نہیں رکھا جا سکتا ،خراب ہو جاتا ہے۔ تیز بخاروں میں فالسہ کا جوس دینے سے مریض کو افاقہ ہوتا ہے ۔اس کے بیج قابض ہوتے ہیں اور ان کے کثرت استعمال سے سدہ پیداہوتا ہے۔ اس کی جڑ کی چھال کا جوشاندہ پینا جوڑوں کے درد میں بے حد مفید ہے۔

فالسے کا شربت فساد خون کے لئے بے حد مفید ہوتا ہے۔ اس کی جڑ کی چھال 20 گرام رات کو بھگو کر صبح اس کا پانی پینے سے سوزاک اورپیشاب کی سوزش دور ہوتی ہے۔ فالسے کا متواتر استعمال خون اور صفراکی تیزی کو دفع کرتا ہے۔ فالسے کے پتے، بیج اور پھل میں سے کسی ایک کو پانی میں رگڑ کر پینے سے مثانے کی گرمی دور ہوتی ہے۔ جن افراد میں خون کی کمی ہو وہ فالسہ استعما ل کریں کیونکہ اس سے اچھا اور مفید خون کافی مقدار میں پیدا کرتا ہے۔

پیٹ کا درد

فالسہ آدھا کپ اجوائن ایک چٹکی سفید زیرہ بھنا ہوا آدھا چمچ کالا نمک ایک چٹکی تمام اجزاء کوبلینڈکرکے پی لیں،درد دور ہوجائے گا۔

اسہال

فالسہ آدھا کپ تخم بالنگو 1چمچ فالسے کوایک گلاس پانی کے ساتھ بلینڈ کرکے چھان کر اس میں ایک چمچ بھیگاہواتخم بالنگو ملاکرپی لیں۔اسہال رک جائیں گے۔

دل کے امراض

فالسہ آدھا کپ مصری ایک چمچ سفید زیرہ آدھا چمچ سونف آدھا چمچ عرق گلاب دو چمچ ان تمام اجزاء کوبلینڈ کرکے پینے سے بڑھا ہوا بلڈ پریشرکم ہوتاہے۔یہ شربت معدے،جگر اوردل کوطاقت دیتاہے۔

قبض کے لئے

فالسہ آدھا کپ ادراک ایک چھوٹا ٹکڑا سفید زیرہ آدھا چمچ کالا نمک ایک چٹکی تمام اجزاء کوبلینڈکرکے پی لیں، قبض کامسئلہ حل ہوجائے گا۔

بخار کے لئے

فالسہ آدھاکپ ایک گلاس پانی کے ساتھ بلینڈ کرکے چھان کر پسی سونف ایک چائے کاچمچ ملاکر پی لیں توبخار اتر جائے گا۔

پیشاب کی نالی کی انفیکشن کے لئے

آدھاکپ فالسہ ایک گلاس پانی کے ساتھ بلینڈ کرکے چھان لیں پھر اس میںایک چمچ پساہوا زیرہ بھی شامل کرکے پی لیں۔

صربۃ الشمسسے بچاؤ

فالسہ آدھا کپ کالا نمک ایک چٹکی کالی مرچ ایک چٹکی زیر ہ سفید آدھا چمچ ان تمام اجزاء کوبلینڈ کرکے پینے سے ہیٹ اسٹروک سے بچائو میں مدد ملتی ہے۔

فالسے کا شربت بنانے کا طریقہ

2فالسہ 250گرام

پانی 500ملی لٹر چینی حسب ضرورت

برف حسب ضرورت گرائنڈر میں فالسہ ،پانی ، چینی اوربرف شامل کر کے اچھی طرح گرائنڈکرلیں اور شربت کو چھنی سے چھان لیں تاکہ سارے بیج چھنی میں رہ جائیں ۔ مزیدار فالسہ کا شربت تیار ہے ۔ گرمی کے موسم میں ٹھنڈے ٹھنڈے فالسہ کا شربت استعمال کریں۔

نوٹ : چینی کے بجائے کالا نمک بھی شامل کر کے استعمال کیا جاسکتا ہے ۔ شربت جتنا ٹھنڈا ہوگا اتنا ہی پینے میں مزہ بھی آئے گا۔

٭…٭…٭