سرخ مرچ افادی پہلو

پاکستان کے ہر گھر میں عام استعمال ہونے والا ایک مصالحہ آپ کو ہمیشہ صحت مند رکھنے میں مدد دے سکتا ہے۔ اس مصالحے کو چبانا آسان نہیں مگر پسی ہوئی سرخ مرچیں آپ کی صحت پر جادوئی اثرات مرتب کرتی ہیں، جن کے بارے میں جان کر آپ دنگ رہ جائیں گے۔

جوڑوں اور مسلز کے درد میں کمی

سرخ مرچ جوڑوں اور مسلز کے درد میں کمی لانے میں مدددے سکتی ہے، کیپسیئننامی جز جو ان میں پایا جاتا ہے، ایسی متعدد ادویات میں پایا جاتا ہے جو کہ جوڑوں کے امراض اور مسلز کے درد کے لیے کھائی جاتی ہیں۔ چند چٹکی سرخ مرچ پاڈر کو 2 سے 3 چائے کے چمچ زیتون کے تیل میں ملائیں، اسے روزانہ درد سے متاثر جوڑوں میں لگائیں، شروع میں جلن کا احساس ہوگا، مگر ایک ہفتے میں یہ حساسیت ختم ہوجائے گی، تاہم اس سیال کو منہ اور آنکھوں وغیرہ سے دور رکھیں۔

کیلوریز جلانے میں مددگار

ایک تحقیق کے دوران 5 افراد کو کھانے کے ساتھ آدھا چائے کا چمچ سرخ مرچ کا استعمال کرایا گیا تو ان کی کھانے کی اشتہا کم ہوگئی جبکہ کیلوریز تیزی سے جلنا شروع ہوگئیں۔ رضاکاروں نے اعتراف کیا کہ نمکین، چربی یا میٹھے کھانوں کے لیے ان کی خواہش میں کمی آگئی ہے۔ تحقیق کاروں کے مطابق6گرام مرچ کھانے سے جسم ے54سے67 حراریجل جاتے ہیں اور اس طرح وزن میں کمی کی جاسکتی ہے۔

دیگر حیاتین

اس مرچ میں حیاتین ج کے علاوہ دیگر حیاتین مثلاًحیاتین الف، ب2،ب6، ھ اور ک(وٹامن اے، بی2،بی6، ای اور k) بھی پائی جاتی ہیں۔ حیاتین الف آنکھوں کے لئے بہت مفید ہے۔

بند ناک کھولے

کیپسیئن ایسا طاقتور جز ہے جو کہ نظام تنفس کی گزرگاہ میں بلغم کو خارج کرکے گزرگاہوں کو کھول دیتا ہے۔چین اور جنوبی امریکہ میں بھی مرچ خوب کھائی جاتی ہے ۔ تحقیق سے پتا چلا ہے کہ مرچ نہ کھانے والے انگریزوں کے مقابلے میں چین اور جنوبی امریکہ کے لوگوں کے پھیپھڑے بلغم سے صاف رہتے ہیں۔ اس پائوڈر کو کھانے پر چھڑکیں اور بس۔

بلڈ شوگر لیول کم کرے

امریکن جرنل آف کلینیکل نیوٹریشن میں شائع ایک تحقیق میں بتایا گیا ہے کہ ذیابیطس کے شکار افراد معتدل مقدار میں سرخ مرچ پائوڈر سے بنے پکوان کھائیں تو انہیں اس کے بعد بلڈ شوگر لیول کو کم کرنے کے لیے انسولین کی ضرورت کم پڑتی ہے۔ محققین کے مطابق نتائج سے عندیہ ملتا ہے کہ یہ مصالحہ ذیابیطس کے خلاف فائدہ مند ہے۔

دوران خون بہتر کرے

کیپسیئن دوران خون کو بہتر کرنے والا جز بھی ہے اور اس حوالے سے یہ ایسی ادویات یا سپلی منٹس سے بہتر ثابت ہوتا ہے جو کہ دوران خون کے مسائل کے لیے استعمال کیے جاتے ہیں۔ یو ایس نیشنل لائبریری آف میڈیسن کی ایک تحقیق میں بتایا گیا کہ کیپسیئن خون کے دبائو کی سطح کوکم کرنے میں بھی مدد دیتا ہے۔ تاہم یہ دوران خون میں اضافہ کرتی ہے۔

سانس کی بو دور کرے

سرخ مرچ پائوڈر کا ایک اور فائدہ بھی ہے کہ یہ سانس کی بو سے نجات میں مدد دیتا اور یہ منہ میں لعاب دہن بننے میں اضافہ کرتاہے جو کہ سانس کی بوکے تدارک کے لیے ضروری ہے ۔ اس سے منہ کی نمی بھی برقرار رہتی ہے۔ کیونکہ منہ خشک ہونے کا نتیجہ ہی سانس کی بو کی صورت میں نکلتا ہے۔

مرچ کھانے سے جسم کے ہضم و جذب کی صلاحیت عارضی طور پر 25فیصد بڑھ جاتی ہے ۔مرچ توانائی بڑھانے کی بھی تاثیر رکھتی ہے ۔ مرچ کم مقدار میں کھانی چاہیے ۔

٭…٭…٭