کالی مرچ مصالحہ جات کا ایک ضروری جز ہے ۔اس کاپاکستان میں استعمال بہت عام ہے اور اسے لگ بھگ ہر کھانے میں ڈالا جاتا ہے۔
مگر کیا آپ کو معلوم ہے کہ کھانے میں ڈالنے سے ہٹ کر بھی یہ بہت فائدہ مند ہے ؟جی ہاں مختلف امراض کے خلاف یہ بہت کچھ ایسا کرتی ہے جو آپ کو حیران کردے ۔
کالی مرچ سے تمباکو نوشی ترک کریں
ایک تحقیق کے مطابق نکوٹین استعمال کرنے والے کالی مرچ کے تیل کی مہک کو سونگھتے ہیں تو تمباکو نوشی کے لیے ان کی خواہش پوری ہوجاتی ہے۔ ایساکرنے سے لوگوں کے گلے میں ایک ایسی ہی جلن پیدا ہوتی ہے جو کہ وہی لطف پہنچاتی ہے جو سگریٹ پیتے ہوئے محسوس ہوتاہے۔
تھکے ہوئے عضلات کو آرام پہنچائیں
ورزش کے بعد عدم اطمینان محسوس ہورہا ہے؟ تنے ہوئے عضلات کو ڈھیلا کرنے کے لیے سیاہ مرچ کے تیل سے مالش کریں، یہ ایک گرم تیل ہے جو اس جگہ خون کی گردش اور حرارت بڑھا دیتا ہے، جہاں اسے لگایا جائے۔ دو قطرے سیاہ مرچ کے تیل کو ایک چمچ چائے روزمیری آئل میں ملائیں اور اسے متاثرہ مقام پر لگالیں۔
پیٹ کے مسائل دور کرے
کالی مرچ کا غذائی استعمال معدے کے لیے بہتر ہوتا ہے کیونکہ یہ کھانے کو ہضم کرنے میں مدد دیتی ہے، جبکہ یہ معدے کے ایسے تیزاب کو بھی حرکت میں لاتی ہے جس سے کھانا جلد ہضم اور قبض ختم ہوجاتی ہے۔
تر کھانسی سے آرام
کھانسی پر قابو پانا چاہتے ہیں توکالی مرچ کو شہد کے ساتھ چائے میں استعمال کریں۔ کالی مرچ بلغم کو حرکت میں لائے گی جبکہ شہد کھانسی سے آرام دلانے والی قدرتی چیز ہے۔ 200ملی گرام پسی ہوئی کالی مرچ اور دو چائے کے چمچکے برابر شہد ایک کپ میں ڈالیں، اس کے بعد اسے ابلتے ہوئے پانی سے بھردیں اور پندرہ منٹ بعد ہلا کر پی لیں۔ ایک اور گھریلو ٹوٹکا یہ ہے کہ لیموں کی قاش پر کالی مرچ چھڑکیں اور اس قاش کو جتنا ہوسکے چوسیں تاکہ بلغم سے فوری ریلیف مل سکے۔
جلدی نگہداشت کے لیے فائدہ مند
کالی مرچ جراثیم کش اور اینٹی آکسیڈنٹس سے بھرپور ہوتی ہے جو شفاف جلد کے حصول میں مدد دیتی ہے۔ یہ خون کی گردش کو قدرتی طور پر بڑھا دیتی ہے اور اپنی حرارت سے جلد کے مساموں کو کھول کر ان کی صفائی کرتی ہے۔
کپڑوں کے رنگ مدھم نہ ہونے دے
دھونے سے آپ کی پسندیدہ شوخ رنگ قمیض کا رنگ مدھم ہوگیا ہے؟ اگر ایسا ہے تو اگلی بار دھوتے ہوئے ایک چائے کا چمچ کالی مرچیں واشنگ مشین میں ڈالے گئے کپڑوں پر چھڑک دیں، جس کے بعد مشین کو چلائیں۔ یہ رنگوں کو برقرار رکھے گی۔
کنزا زاہد یار خان
٭…٭…٭
