قدرتی جڑی بوٹیاں اپنے اندر اچھی صحت کے لئے بہت سی خوبیاں لیے ہوتی ہیں اسی لیے جیسے جیسے ان پر تحقیق آگے بڑھ رہی ہے ان کے بہت سے فوائد بھی سامنے آرہے ہیں ۔اب نئی تحقیق میں کہا گیا ہے کہ ادرک سے بنی چائے وٹامن سی سے بھرپور ہوتی ہے جو صحت کے لیے انتہائی مفید ہے۔
متلی میں مفید
اگرکسی شخص کو سفر کے دوران متلی کی شکایت ہو تو اسے چاہیے کہ وہ سفر سے پہلے ایک کپ ادرک کی چائے پیئے جو پورے سفر کے دوران متلی اور قے سے دور رکھے گی اور وہ سفرکا لطف اٹھا سکے گا۔
معدے کی صلاحیت کو بہتر بناتی ہے
ادرک کی چائے نظام ہضم اور غذا کو جذب کرنے کی صلاحیت کو بڑھاتی ہے اور بالخصوص بہت زیادہ کھانے کے بعد اس چائے کو پینے سے پیٹ میں گیس کے باعث پیدا ہونے والے ابھار یا سوزش کو ختم کرتی ہے۔
جلن کو دور کرنے والی
ادرک میں جلن پیدا کرنے والے عناصر کو ختم کرنے کی صلاحیت ہوتی ہے جب کہ اس کے علاوہ ادرک کی چائے کا ایک کپ پٹھوں اور جوڑوں کے درد میں بھی آرام دیتا ہے۔
سینے کے لئے مفید
ادرک کی چائے سینے کے جکڑنے اور شدید نزلے میں انتہائی مفید ہے جب کہ ماحولیاتی الرجی سے سانس کی تکلیف میں بھی ادرک کی چائے جادوکا کام کرتی ہے۔
دوران خون کو بڑھاتی ہے
ادرک میں موجود وٹامنز، معدنیات اورامائنو ایسڈ جسم میں دوران خون کو بہتربنا کردل کی بیماریوں کے خطرے کو کم کردیتا ہے جب کہ ادرک کی چائے آنتوں میں پیدا ہونے والی چکنائی کو بننے سے روکتی ہے جس سے دل کے دورے اور اسٹروک سے محفوظ رہا جا سکتا ہے۔
خواتین کے مخصوص ایام میں مفید
ادرک کی چائے خواتین میں حیض کے دوران تکلیف سے بچاتی ہے۔ ادرک کے گرم قہوہ میں تولیہ بھگو کر اسے پیٹ پررکھیں، اس سے تکلیف میں آرام ملتا ہے جب کہ اس کے ساتھ ایک کپ ادرک کے چائے میں شہد ملا کر پی لیں۔
اگر ادرک کی چائے کا ذائقہ تلخ لگے تو اس میں شہد یا لیموں ملا کر اسے خوش ذائقہ بنا سکتے ہیں۔
٭…٭…٭
