حیاتین سے جلد میں تازگی اور نکھار

ورکنگ وومن بننا آسان نہیں، اس کی ایک وجہ تو یہ ہے کہ خاتونِ خانہ کے مقابلے میں ورکنگ وومن کو ڈبل ذمہ داریاں پوری کرناپڑتی ہیں۔ اسے نہ صرف اپنی پیشہ ورانہ ذمہ داریاں نبھانا پڑتی ہیں، بلکہ وہ گھر کی دیکھ بھال سے بھی غافل نہیں رہتی۔ایسے میں ورکنگ ویمن کو اپنی صحت، خوبصورتی اور جلد کا خیال رکھنے کے لیے بھی مناسب وقت نہیں مل پاتا۔ بیوٹی پارلر جانا تو دور کی بات، اکثر انہیں گھر میں بھی وقت نہیں مل پاتا کہ اپنی جلد اور خوبصورتی کو بحال رکھنے کے لیے وقت نکال سکیں۔ تاہم ایسی ورکنگ ویمن کو زیادہ پریشان ہونے کی ضرورت نہیں کیونکہ اگر وہ اپنی غذا کو متوازن بنالیں تو اپنی خوراک سے بیوٹی کریمز اور بیوٹی پارلر کا کام لے سکتی ہیں یعنی متوازن خوراک کے ذریعے اپنی خوبصورتی اورنکھری نکھری جلد کو بحال رکھ سکتی ہیں ۔ اس کے ساتھ ہر قسم کے ذہنی دبائو اور اعصابی تنائو سے دور رکھنے کی کوشش آپ کے چہرے پر مثبت اثرات مرتب کرتی ہے۔ یوں تو متوازن غذا ہر ایک کے لیے ہی انتہائی ضروری ہوتی ہے، مگر کچھ ایسی غذائیں بھی ہیں جنہیں اگر آپ اپنی روز مرہ خوراک کا حصہ بنالیں تو اس سے چہرے پر نکھار پیدا ہوگا اور رنگت بھی نکھر جائے گی۔

سورج مکھی کے بیج

سورج مکھی کے چھوٹے چھوٹے بیجوں میں وٹامن ای کی وافر مقدار موجود ہوتی ہے، جو جلد کو ہرطرح سے صحت مند رکھنے میں اہم کردار ادا کرتے ہیں۔ اس لیے اپنے روز مرہ کے کھانوں میں بادام کے ساتھ سورج مکھی کے ان بیجوں کا بھی استعمال کریں اور پھر اس کے حیرت انگیز نتائج اپنے چہرے پر دیکھیں۔ موسم کے تغیرات، چہرے کی جلد پر اثر انداز ہوتے ہیں اور خلیات ٹوٹ پھوٹ کا شکار ہوجاتے ہیں، جس کا اثر چہرے پر بھی پڑتا ہے۔ وٹامن ای ان خلیات کو دوبارہ بنانے اور انہیں قائم رکھنے میں مددگار ثابت ہوتا ہے، جلد میں تازگی اور نکھار پیدا ہوتا ہے اور جلد صحت مند رہتی ہے۔

تخم بالنگو

اس جادوئی بیج میں موجود اومیگا تھری فیٹی ایسڈ، جسم میں موجود ایسے سیل یا خلیات کو برقرار رکھنے میں مدد دیتا ہے، جس سے جلد کی حفاظت ہوتی ہے۔ یہ جلد کو قدرتی موئسچرائزر بھی فراہم کرتا ہے۔ تخم بالنگو کے ساتھ اخروٹ میں بھی ان فیٹی ایسڈ کی بھرپور اور وافر مقدار پائی جاتی ہے۔ تخم بالنگو میں قدرتی طور پر ایسے اجزاء پائے جاتے ہیں، جونہ صرف جلد کی حفاظت کرتے ہیں بلکہ قدرتی چمک برقرار رکھنے میں بھی معاون ثابت ہوتے ہیں۔

شکرقندی

اسے سویٹ پوٹیٹو بھی کہا جاتا ہے، اس میں پانی کی بھرپور مقدار پائی جاتی ہے۔ اس سے آپ کے جسم کو بہت پانی ملتا ہے، یہ آپ کی جلد اور جسم میں موجود دوسرے خلیات کو ڈی ہائیڈریٹ (پانی کی کمی ) ہونے سے بچاتا ہے۔ اس لیے ماہر غذائیت اور ماہرآرائش، اس بات کا مشورہ دیتے ہیں کہ اپنی غذا میں شکر قندی کو ضرور شامل کریں، کیونکہ اس میں موجود پانی، جلد کو بے حد فائدہ دیتا ہے، رنگت صاف ہوتی ہے اور جلد میں قدرتی طور پر شادابی پیدا ہوتی ہے۔ بالکل اسی طرح دوسری سبزیاں، مثلاً گاجر، پالک اور شکرقندی میں وٹامن ای کی بھی وافر مقدار ہوتی ہے۔ ان سبزیوں کے استعمال سے جلد میں سرخی اور تازگی پیدا ہوتی ہے۔ گاجر، شکر قندی اور پالک کو پکانے کے بجائے، اگر انہیں صرف ابال کرہی استعمال کیا جائے تو اس کے مثبت نتائج جلد سامنے آتے ہیں۔

٭…٭…٭