ٹانگوں اور پنڈلیوں کا درد بچنے کے طریقے

ٹانگوں کا اکڑ جانا یا عضلات کا کھچائو دنیا بھر میں بہت عام سا طبی مسئلہ ہے جس کا سامنا ہر عمر کے افراد کو ہوسکتا ہے۔تاہم معمر افراد اور حاملہ خواتین میں اس کی شرح زیادہ ہوتی ہے۔پائوں اور ٹانگوں کے اکڑنے کا مسئلہ عموماً جسم میں پانی کی کمی یاعضلات پر دبائو کے نتیجے میں ہوتا ہے مگر کئی بار اس کی وجہ زیادہ سنگین ہوسکتی ہے جیسے خون کے لوتھڑے، اعصاب کا دب جانا یا کسی معدنی جز کی کمی۔تاہم اچھی بات یہ ہے کہ اس سے بچائو اور علاج زیادہ مشکل نہیں بلکہ چند آسان چیزوں سے کیا جاسکتا ہے۔

پانی پینا عادت بنائیں

جسم میں پانی کی کمی عموما ًٹانگوں کے اکڑنے کا باعث بنتی ہے، اس وجہ سے یہ بہت ضروری ہے کہ دن بھر میں مناسب مقدار میں پانی پیا جائے، اگر پہلے ہی ٹانگوں کو اس مسئلے کا سامنا ہے تو بھی مناسب مقدار میں پانی پینا ،اس تکلیف کو کم کرنے میں مدد فراہم کرسکتا ہے۔

مخصوص منرلز سے بھرپور غذاؤں کا استعمال

چار اہم اجزاء کیلشیم، پوٹاشیم، میگنیشم اور سوڈیم کی کمی بھی عضلات کے کھچا ئوکا باعث بنتی ہے تو جسم میں ان کا توازن برقرار رکھنا بہت ضروری ہوتا ہے۔

سیب کا سرکہ بھی مددگار

سیب کے سرکے کا استعمال بھی اس مسئلے سے نجات میں مددگار ثابت ہوسکتا ہے، کیونکہ اس میں اہم اجزاء سوڈیم، میگنیشم اور پوٹاشیم موجود ہوتے ہیں، جبکہ یہ جسم کی مختلف رطوبات کا توازن برقرار رکھنے اور پانی کی کمی کی بھی روک تھام کرتا ہے۔

مالش

جب ایک عضلہ اکڑ جائے تو عموماً دوران خون کم ہوجاتا ہے جس سے آکسیجن اور دیگر اہم اجزاء کی کمی ہونے لگتی ہے، متاثرہ حصے کی مالش سے دوران خون کو بحال کیا جاسکتا ہے نیز عضلات کو سکون اور درد میں کمی لائی جاسکتی ہے، مالش کو اس مسئلے سے بچا ئوکی تدبیر کے طور پر بھی استعمال کیا جاسکتا ہے۔

گرم اور ٹھنڈے کمپریسر سے مدد لیں

کسی گرم پیڈ کو بھی متاثرہ حصے پر لگانے سے دوران خون کو بڑھایا جاسکتا ہے، جبکہ آئس پیڈ سے متاثرہ حصے کو سن کرکے سوجن میں کمی لائی جاسکتی ہے۔یا دونوں کو ایک کے بعد ایک استعمال کیا جاسکتا ہے، تاہم یہ طریقہ کار ذیابیطس، درد شقیقہ یا دیگر طبی امراض کے شکار افراد کے لیے مناسب نہیں کیونکہ اس سے ٹانگیں سن ہوسکتی ہیں۔

پورا دن بیٹھنے سے گریز

ٹانگوں کے اکڑنے کا مسئلہ عضلات کے کم استعمال کی وجہ سے بھی ہوتا ہے، اگر آپ اپنے دفتری امور کی وجہ سے زیادہ وقت بیٹھ کر گزارتے ہیں تو کوشش کریں کہ ہر گھنٹے بعد کچھ سیکنڈز کے لیے کھڑے ہوجائیں اور جتنا ممکن ہوسکے چہل قدمی کریں۔

٭…٭…٭