لیموں ایک ایسا پھل ہے جو گھروں میں بہت عام استعمال ہوتا ہے اس کے چھلکوں، عرق اور دیگر اجزاء میں متعدد طبی فوائد بھی پائے جاتے ہیں۔وٹامن سی سے بھرپور ہونے کے باعث اسے متعدد فوائد کا حامل مانا جاتا ہے۔ جبکہ یہ متعدد امراض سے تحفظ دینے کے لیے بھی مفید ہے۔آپ اس کا عرق پانی میں شامل کردیں یا کسی کھانے پر چھڑک دیں، اس کا ترش ذائقہ وہ تمام وٹامنز اور منرلز فراہم کرتا ہے جو دیگر ترش پھلوں میں بھی موجود ہوتے ہیں اور سب سے اچھی بات یہ ہے کہ اس میں مٹھاس بہت کم ہوتی ہے۔ لیموں کے فوائد جان کر آپ دنگ رہ جائیں گے۔
جھریاں آپ سے دور رکھے
یہ سب کمال وٹامن سی کا ہے جو ہمارا جسم خود نہیں بناسکتا، تو اسے غذا سے ہی حاصل کیا جاتا ہے، یہ پروٹین کولیگن بنانے میں مدد دیتا ہے جو جلد کو لچکدار رکھتا ہے، اس پروٹین کی کمی کے نتیجے میں جھریاں نمودار ہونے لگتی ہیں، یقینا یہ عمر میں اضافے سے پیدا شدہ پیچیدگیوں کا ایک قدرتی حل بھی ہوتا ہے کیونکہ درست وٹامنز اور غذائیت سے آپ اس عمل کو سست کرسکتے ہیں۔
سانس کی بو دور کرے
لیموں کی مہک سانس سے ناگوار بو کو دور کردیتی ہے اور درحقیقت یہ اس مسئلے کا بہت آسان حل ہے، اس مقصد کے لیے آپ ایک گلاس نیم گرم پانی میں ایک لیموں کا عرق ملا کر کئی بار کلیاں کریں۔
جسمانی توانائی فراہم کرے
تھایا مین اور رائبو فلاوین وٹامنز بی کا حصہ ہوتے ہیں جو غذا کو جسمانی توانائی میں بدلنے میں مدد دیتے ہیں، اس کے علاوہ یہ خلیات کی نشوونما اور کام کرنے میں بھی مدد دیتے ہیں، ایک لیموں آپ کو وہ جسمانی توانائی فراہم کرسکتا ہے، جس کی آپ کو ہر روز ضرورت ہوتی ہے۔
اینٹی آکسیڈنٹس کا کام کرے
وٹامن سی، فلیوونائیڈز، فینولک ایسڈز اور آئلز کورین لیموں میں نسبتاً زیادہ موجود ہوتے ہیں اور یہ سب مل کر اینٹی آکسیڈنٹس کے طور پر کام کرتے اور نقصان دہ فری ریڈیکلز کے خلاف لڑتے ہیں جو خلیات کو نقصان پہنچا کر سنگین امراض اور دیگر طبی مسائل کا باعث بنتے ہیں۔
حاملہ خواتین کے لیے مفید
لیموں میں وٹامن بی فولک ایسڈ یا فولیٹ کی کچھ مقدار ہوتی ہے جو ماں کے پیٹ میں موجود بچے کی صحت کے لیے مفید ہوتے ہیں۔ خلیات فولک ایسڈ کو استعمال کرکے مزید خلیات میں تقسیم ہوجاتے ہیں جبکہ یہ ایسا جینیاتی مواد بھی تیار کرتے ہیں جو بچے کے خلیات کو اپنی یادداشت کے مطابق بتاتا ہے کہ کس طرح جسم کو بنانا چاہیے۔
خطرناک جراثیموں کا خاتمہ
تیزابیت کی موجودگی کی وجہ سے لیموں سالمونیلا بیکٹیریا کو مارنے میں مدد دیتے ہیں جو آپ کی غذا، گوشت کاٹنے کے بورڈ یا کچن کائونٹر پر ہوتے ہیں، جس سے امراض سے بھی تحفظ ملتا ہے۔
بلڈ پریشر میں کمی
لیموں اور اس کے چھلکے کو پانی میں ملا کر پینا اس حوالے سے مددگار ثابت ہوسکتے ہیں، کچھ مقدار میں لیموں کا عرق پانی میں ملا کر چہل قدمی سے پہلے اور بعد میں پی لیں، اگر ادویات استعمال کرتے ہیں تو معالج سے مشورہ کرلیں کیونکہ ترش ذائقہ ان ادویات کے اثرات میں مداخلت کرسکتا ہے۔
کینسر کی روک تھام
اگرچہ اس حوالے سے شواہد موجود نہیں کہ لیموں کینسر سے لڑنے میں مدد دیتے ہیں، مگر ان میں موجود اینٹی آکسیڈنٹس ممکنہ طور پر کینسر سے بچانے میں مدد دے سکتے ہیں، خصوصا ًجگر، ہڈیوں، معدے، بریسٹ اور قولون کینسر سے بچانے کے لیے مفید سمجھے جاتے ہیں۔
دل کو صحت مند بنائے
لیموں میں موجود فلیوونائیڈز امراض قلب کا خطرہ کم کرتے ہیں، کیونکہ یہ چکنائی اور شکر کو خون سے دور رکھنے میں مدد دیتے ہیں، شکر اور چکنائی دونوں کامقدار میں زیادہ ہونا خون کی شریانوں کے لیے نقصان دہ ثابت ہوتا ہے۔
ذہنی صحت بہتر کرے
لیموں میں ایسے خصوصی کیمیکلز ہوتے ہیں جو دماغی خلیات کو جسم میں موجود زہریلے مواد سے بچانے میں مدد دیتے ہیں، اس کے علاوہ وہ خلیات کی توڑ پھوڑ اور ورم سے بھی تحفظ فراہم کرسکتے ہیں، جس سے مختلف دماغی امراض جیسے پارکنسن اور الزائمر کا خطرہ بھی کم ہوتا ہے۔
مسوڑھے صحت مند بنائے
سوجن کے شکار، خون نکلنے اور دانت ہلنے جیسے مسائل بہت عام ہوتے ہیں اور تمباکو نوشی، عمر میں اضافے وغیرہ سے ان کا خطرہ بڑھتا ہے تو لیموں ان سے بچائو میں مدد دے سکتا ہے جس کی وجہ اس میں وٹامن سی کی موجودگی ہے، مگریہ ذہن میں رہے کہ اس میں موجودسائٹرک ایسڈ دانتوں کی سطح کے لیے نقصان دہ ہوسکتا ہے، تو اس ایسڈ والی چیز کھانے یا پینے کے بعد دانتوں کو 30 منٹ تک برش نہ کریں۔
موسمی نزلہ و زکام سے نجات
ویسے تو وٹامن سی موسمی نزلہ وزکام کی روک تھام نہیں کرسکتا مگر لیموں کے ذریعے اس وٹامن سی کو جزوبدن بنانا جسمانی مدافعتی نظام کو بہت مضبوط بناتا ہے، نزلے کی پہلی علامت کے ساتھ ہی اس کا استعمال جلد صحت یاب ہونے میں مدد دے سکتا ہے۔
کولیسٹرول کی سطح بہتر کرے
لہسن اور لیموں کے جوس کے آمیزے کا روزانہ استعمال ہائی کولیسٹرول کے شکار افراد کے لیے مفید ثابت ہوسکتا ہے، کولیسٹرول کی سطح میں اضافے سے شریانوں کے اکڑنے کا خطرہ بڑھتا ہے، جس سے امراض قلب، ہارٹ اٹیک اور فالج کا خطرہ بڑھتا ہے۔
جسمانی وزن میں کمی
لیموں میں موجود پولی فینولز ایسے اینٹی آکسیڈنٹس جسمانی وزن اور چربی کو بڑھنے سے روکنے میں مدد دے سکتے ہیں، طبی ماہرین کے خیال میں پولی فینولز سے جسم چربی اور انسولین کے حوالے سے بہتر ردعمل ظاہر کرتا ہے، تاہم اس حوالے سے انسانوں پر کوئی تحقیق نہیں ہوئی۔
گردوں کی پتھری کی روک تھام
گردوں کی پتھری انتہائی تکلیف دہ مرض ہوتا ہے جو جسم میں منرلز کے اجتماع کا نتیجہ ہوتے ہیں، لیموں اور دیگر ترش پھلوں میں موجود citrates اس اجتماع کو روکنے میں مدد دے سکتے ہیں، جس سے گردوں میں پتھری کا امکان کم ہوتا ہے۔
٭…٭…٭
